財政司司長唐英年去墨西哥開世貿會議，開足六日六夜，本來以為可以促成多哈回合談判，明年底在港簽「香港決議」威到盡，點知俾非洲國家一聲「Walkout」，搞到一鑊泡，𠵱家唔知可唔可以縮沙。
唐英年本來預計個會要開到墨西哥時間九月十五日朝早，所以買定下午五點幾機票返香港，點知忽然散檔，佢無端端多咗大半日假。
不過佢話喺坎昆唔敢出街：「我驚俾非洲代表打！」原來財爺作為大會「主席朋友」，可以入GreenRoom（即係機密房）同各方大佬傾偈。當佢知道非洲代表準備翻枱之際，即刻鬧佢哋唔顧大局，但係非洲代表唔聽佢支笛，大家不歡而散。
又難怪財爺呢鋪咁㷫嘅，因為佢為咗去墨西哥開會，真係捱更抵夜，又要趕返香港做署理特首。唐司長話成世人都未開過咁長嘅會，重要傾唔成，真係嘥心機捱眼瞓。
（圖）BBC記者見唐英年咁失望，即刻同佢做直播訪問，財爺可以增加一點國際知名度，都算有啲收穫。 羅綺萍坎昆傳真
傳真︰2623-9278
電郵︰