區議會選舉在即，各大政黨都諗盡辦法出位，好似劉慧卿咁，無端端因台灣一行講咗兩句「尊重台灣人民意願」，佢阿姐喺沙田嘅地區辦事處俾人潑屎，出鏡同見報率大增，重做埋TVB晚間新聞頭條，好少有也。
唔怪得民主黨嘅何俊仁恨到出聲，話潑屎黨如果潑埋民主黨就好啦。
當然選舉真係要講緣份，各黨就要為選舉調兵遷將，但係啲獨立議員好似余若薇同梁家傑咁，就無論去邊度選，用乜嘢比例代表制選都會贏。
李永達噚日就同八方一班行家分析形勢，重大爆余若薇會再次參選立法會嘅極好消息，咁如果余、梁兩位大律師都喺港島參選，咁嗰區嘅形勢就好玩了。
而最危險嘅當然係民主黨，佢哋分分鐘要叫馬丁轉區，因為馬丁同華叔係白鴿黨最有實力之人，去邊區都冇問題。
傳真︰2623-9278
電郵︰