美國冇事，911安然度過，港股彈出，恒指升109點，地產股帶動，電訊股亦有勢，其中聯通（762）收5.70元，升4.6%，跑贏大市同跑贏恒指。其次電盈（008）收4.75元，亦升10仙。
電盈呢排新聞唔少，李澤楷昨日又再講舊事，希望政府能夠撤銷電盈喺固網市場領導者地位。若然成事，電盈嘅競爭條件即時提高，評價亦係，不過，有排先知道會否有咁嘅結果。但就算拖落去，電盈貝沙灣好賣，有助減債，而股價又落後大市好多，炒落後都好自然會出現。
電盈有彈升潛力，搵Call輪炒。最正路嘅9791，明年3月到期，輪價67仙，溢價8.8%，槓桿率7.1倍。其他電盈輪，槓桿率大好，不過要畀高好多溢價，如果正股升幅好大，呢啲Call輪彈得好勁。但若然正股只係穩步上升，則9791會跑贏佢嘅，穩陣投機，9791比較啱。
大隻銀行股中，恒生（011）升1元，中銀（2388）升15仙，滙豐（005）比較慢啲，升得1格，估計遲早由其他大銀行上升帶動，先幾日提過嘅滙豐Call輪9845，值博率好高，年底到期，輪價69仙，溢價0.9%，槓桿率14.6倍，正股升10%嘅話，隻輪會升130%，有兩個半月時間賭，諗得過。
章盛