墨西哥度假勝地坎昆（Cancun），呢幾日貿易部長多過酒樓部長，但係個個部長日以繼夜開會，陽光與海灘對佢哋嚟講，同風景畫冇乜分別。
工商及科技局局長曾俊華雖然去唔到游水，但係都忙裏偷閒，去咗買有關佢偶像捷古華拉嘅傳記，佢話呢位古巴革命英雄嘅書，香港唔係咁易買到。由坎昆飛去古巴首都哈瓦那，只係一個鐘飛機，兩地相近，所以坎昆好多捷古華拉紀念品買。
讀者如果唔知邊個係捷古華拉，可以去問吓長毛梁國雄，因為佢一日到黑都着住捷古華拉嘅T恤，對呢位對抗美國嘅革命英雄好熟識。
今次在坎昆嘅非政府組織大遊行中，都有好多捷古華拉fans，曾局長一定好好feel，可惜遊行主題係反世貿反全球化，同曾局長唔啱key。
講開遊行，坎昆呢幾日熱到飛起，中午時分採訪遊行認真難頂，特別係電視台攝影師，抬住部機爬上爬落就熱上加熱。好似呢個阿根廷攝影師咁樣着法（圖），就夠晒涼快。
傳真︰2623-9278
電郵︰