前綫噚晚慶祝七周年會慶，特別喺葵芳搞咗個晚會，筵開五十六圍款待各方友好，重請埋律政司司長梁愛詩、房屋及規劃地政局局長孫明揚；八方又見到民主黨嘅楊森、職工盟李卓人同時事評論員黃毓民，場面都好熱鬧。
傳媒行家見到孫公出現，就咬住問幾時又出招托市。孫公起初都冇乜嘢，只回答今日唔係時候講呢啲嘢，重講笑話「冇招、冇招」。點知行家食住上，話「冇招托市」會上今日報紙頭版，孫公聽到面黑黑，諗住走去前綫召集人劉慧卿同民主黨主席楊森度避開記者追問。
點知劉、楊冇幫孫公解圍之餘，重加把口話佢哋（記者）想問乜，你咪答佢囉，搞到孫公鬼咁尷尬。
據八方所知，自從孫公做咗房屋最高負責人之後，佢已經同地產商過咗唔少招，當日九招出盡，未見起色，於是各方又傳孫公重有第十，第十一招，其實說穿了，甚麼招都不及信心招，只要大家重驚住未來嘅樓市會繼續下滑，咁就講乜都冇用。而最近傳聞班大陸同胞正要殺嚟香港買樓炒股，人心轉穩，孫公正為樓價止跌回升感到高興，準備冇招勝有招，奈何記者同地產商一樣，係都唔放過佢。
前綫嘅酒會喺葵芳美心酒樓搞，八方問卿姐點解去咁遠，莫非價錢平啲，抑或要避開潑屎黨？卿姐梗係話無關，因為一早已訂咗位。
卿姐噚晚一襲黃衫，成隻穿花蝴蝶咁，周旋喺六、七百賓客之間，坐主家席者，尚有梁耀忠、何俊仁、羅沃啟等，卿姐非常high，只見佢上台大叫三聲董建華，每叫完一次，台下都如雷回應──下台！跟往大家又講起啲屎，有人笑謂可以攞去檢DNA，亦有人話唔得，因為掟嗰個未必係用自家出品；屎尿屁笑聲齊來，未損筵席興致。
（圖）孫明揚（左）走去劉慧卿度避開記者，點知卿姐重加把口幫記者，搞到孫公好尷尬。
成啟聰攝
傳真︰2623-9278
電郵︰