上星期，我哋個四眼編輯，隻身飛咗去德國法蘭克福睇車展，雖然當時臨近9·11，惟收到風話歐洲各大車廠新車蜂擁推出嘅關係，響千萬個不願意嘅情況下，只好毅然上路。然而，四眼編輯返到香港之後，對亞Mark講真係不枉此行，除新車琳瑯滿目，令人目不暇給外，最難得重係各大車廠響各款新產品上注入不少創意及元素；就好似Smart咁，推出部迷你CityCar咁多年，重以為佢哋唔會再有後繼車，怎知早前廠方落實，好快會推出一部Roadster小跑車，兼且既有硬頂Coupe，重有硬頂開篷版本㖭！四眼編輯能夠近距離望過部車，重比香港車迷快一步試坐，佢話好好Feel喎！之不過大家唔使羨慕，皆因亞Mark收到風，話部SmartRoadster會響今個月嘅9月25日，喺香港跟車迷見面，而當日代理重會搞一個大型發布會㖭！聽聞今趟Roadster重係首度響亞洲率先登場，身為香港車迷嘅你同我，真係與有榮焉㗎！