飲食人誌：落吧劈竹炒葉青

飲食人誌：落吧劈竹炒葉青

「小二，攞一埕花雕王嚟！」呢種對白原來唔止喺武俠片中出現，今晚同班朋友蒲吧時你都可以咁叫酒，豪氣一番。因剛開業嘅天與地龍門酒莊，從內地引入十多款中國酒，更調配成多款自創中式Cocktail。等身為中國人嘅你，有機會一試「酒是故鄉醇」呢種滋味。

記者：馬慶武　攝影：陳陶鈞

由踏上樓梯一刻開始，已經見到牆上掛滿中國味十足嘅面具、牌坊，連酒吧內嘅梳化都印有中國Monogram。酒莊老闆Anna話開呢間充滿中國色彩嘅酒吧，係想有更多香港年輕人可以接觸到中國傳統醇酒：「呢度咁近蘭桂坊，希望吸引多啲蒲開吧嘅後生仔女，相信佢哋都會覺得落吧飲中國酒會好有新鮮感。」可以一試「劈」竹葉青、五加皮嘅滋味。

■長城$60
味道以橙汁、桃酒果香味為主，唔少得嘅梗係中國酒，呢杯就加入咗竹葉青。

中式Cocktail

■雪鶴$60
玫瑰露遇上菠蘿汁、椰子奶，充滿熱帶風情。

■青竹筏$60
飲完極度清涼，因為呢杯青竹筏除咗有竹葉青、七喜之餘，重加埋薄荷葉一同調製。

■踏雪紅玫$60
玫瑰露、士多啤梨、梳打再加冰粒攪拌而成，飲落似玫瑰露酒沙冰，怕啃人士啱飲。

最愛中國酒易入口
Anna數年前已開始接觸中國酒：「雖然中國酒都幾啃，但比威士忌、白蘭地等洋酒易入口，而且飲落真係好甘香。」因為易入口，唔覺唔覺都幾易醉，所以為酒量淺嘅客人，創製出一系列加入中國酒調配嘅Cocktail。

■全部Cocktail都係Anna親自試味之後，再同調酒師研究出嚟嘅，改良咗幾次先完成㗎。

■酒莊內有4間半開放式廂房，可以感受強勁音樂之餘，亦可享受私人空間。

■酒莊內有好多中國味勁濃嘅布置，天花重掛滿螺旋型嘅「香」，有食客講笑咁話好似入咗一間廟宇咁。

Remix中國音樂
呢間酒莊不但「表面」中式化，連播放嘅音樂都一樣中國風。採訪當日場內嘅100吋投射螢幕便不斷播放中國京劇歌曲。Anna重話已經請咗一位上海DJ，遲啲會嘗試將以中國傳統音樂Remix成Disco音樂。可跟住以古箏、二胡等中國樂器演奏出嘅強勁節拍嚟個勁歌熱舞。

■大廚Tamaki要建立一個勁乾淨嘅中國廚房。

酒客兩句

■佐酒美食
醬菜凍番茄$30
用日本醬油、醋等調味料浸製嘅鮮番茄，爽口得嚟酸酸甜甜，食飽飯飲酒之前可以清新一下腸胃。

■食得嘅番攤
為咗客人可以盡情享受酒莊播放嘅中國音樂，酒莊內禁止猜枚、玩骰盅，所以就準備咗食得又玩得嘅蠶豆畀酒客們玩「番攤」，估輸咗嘅一樣要即飲。

天與地龍門酒莊
電話：25378083
地址：中環德己立街1-13號世紀廣場地庫
營業時間：星期一至四12:00nn-2:00am，星期五、六12:00nn-3:00am，星期日及公眾假期4:00pm-1:00am

■蘇小姐
啲Cocktail就幾易入口，我都係第一次感受中國酒嘅醇酒香味，唔錯！

■黃小姐
啲酒味幾清喎，不過我覺得呢度啲裝修最特別，好似入咗間廟飲酒咁，好得意。