國產手機品牌多不勝數，好多更係聞所未聞，見所未見，而且國產新機到港嘅頻密程度係其他國家手機之冠，一星期隨時都會有2至3部到港，價錢就更加一部平過一部。就好似今次呢部品牌叫「Dragon」嘅新機，紅卜卜外殼相當搶鏡，襯埋個4,096色彩芒，外形都唔係太差。而GPRS、WAP等上網功能都交足功課，聲效重有16和弦，開價$950就有交易，拍得住之前部PalmaxX308，心口掛個「平」字都一樣有人氣。
查詢：鉑匯科技（23987320）
記者：劉耀祥
由公布到正式賣街相隔兩個月嘅快譯通G18，由於兼具手機及PalmOS功能，所以吸引唔少手機及PDA用家嘅注意，而上個星期就終於有貨派落場，而且價錢更出現「海鮮價」，頭兩日最高上到$4,280，不過呢幾日就已經趨向平穩，回落至$3,980左右。手機舖老闆重話貨量唔係多，分分鐘賣埋就冇貨賣。