係人都知財爺唐公子有位事事關心佢嘅二十四孝媽咪，八方噚晚喺北京見到參與香港婦女訪京團嘅唐媽媽，佢開頭猛叫唔好影相，八方問係咪寶貝仔要佢收聲，唐媽媽話個仔冇咁惡，因為「我惡過佢，我係阿媽嚟吖嘛！」
愛子心切嘅唐媽媽曾經埋怨過財爺官邸細，得三間房唔夠四個孫分，佢噚晚改口，話去過官邸發覺其實都好大間，三個孫女瞓一間房都唔係問題，因為細路住住吓就慣，佢重反問八方：「人哋嗰啲徙置區點住？係咪？」聲就唔收，不過終於同乖仔統一口徑。
佢話乖仔做咗財爺之後，少咗同佢見面，不過星期日都有抽時間返屋企食飯，見個仔咁辛苦，唐媽媽就連跟咗自己好多年嘅工人都借埋畀個仔，等佢多啲湯水，點知搞到自己冇湯飲，老工人惟有又特登煲番啲湯畀唐媽媽飲。
（圖）范徐麗泰（中）同唐媽媽（右）打完招呼就各有各閃，兩位媽媽似乎唔多熟。
傳真︰2623-9278
電郵︰