人哋話三歲定八十，呢句話套用喺萬人迷JustinTimberlake身上，認真貼切不過。原來冧盡美國老中青三代嘅Justin，十年前已經好得女人心，當年佢參加家鄉嘅男童選美，重係五料冠軍嚟㖭！
Justin喺十二歲嗰年已經發明星夢，參加田納西州嘅男童選美。當時嘅Justin，無論打扮同表現都好鬼老積。田納西州盛產鄉謠歌手，Justin就打扮成鄉謠歌手咁跳舞，而喺catwalk環節中，又着住套老西扮行天橋，今日重溫番啲片段，佢嘅舉手投足都只可以用「娘」字嚟形容！
當年重係豆口靚一名嘅Justin，重學識唱經典情歌《WhenAManLovesAWoman》，而且唱得有板有眼，搞到所有女評判暈晒大浪。
最後Justin不負眾望，贏晒最佳模特兒、最佳衣着、最佳運動服裝、最俊俏先生同全場總冠軍五個大獎，攞咗約港幣三萬九嘅獎金。佢亦都靠呢個選美，被星探發掘加入《米奇老鼠俱樂部》，同BritneySpears、ChristinaAguilera結下不解之緣㖭。