新樓盤假期銷情不錯，美國又安然度過911，估計地產股會有運行。
上周五，新世界（017）喺大隻地產股中，走勢出眾，不過冇新世界Call輪可博。地產股若然跑出，唔會少得新地（016）嗰份，吼啲新地Call輪博吓，應該有利潤到手。例牌對象係9071，單日有20球成交，易買賣，隻輪明年3月到期，輪價55仙，溢價3.5%，槓桿率10.3倍。新地Call輪9857，其實亦好抵買，12月到期，輪價1.19元，負溢價1%，槓桿率4.8倍，9857雖然槓桿率唔算爆炸，但勝在有些少負溢價，就算正股牛皮，亦唔怕溢價收縮。不過有時數據靚嘅Call輪，交投往往唔得，9857上周四只有1.1球易手。
數據靚但交投唔得嘅例子，有長實Call輪9756，明年3月到期，輪價86仙，溢價低至2%，槓桿率有7倍，衰在上周四成交得半球多啲。長實熱門Call輪9065，冇錯成交有12球，但到期日與9756相若，輪價60仙，槓桿率10倍，高過9756唔算太多，溢價去到9.5%，咁高溢價，好難覺得抵買。
恒地（012）有隻Call輪9648，好夠爆炸力，下月底到期，輪價16.2仙，槓桿率18.3倍，襯得起溢價2.7%，只不過成交唔夠30萬份，若然睇錯市想投降，會比較困難。
章 盛