通常公司有人辦喜事，同事頂多都係早啲放工去趁熱鬧，不過，九倉老臣子，夏利文地產營業經理梁秉權，就真係有天大嘅面子，一班員工為慶賀佢嫁女，集體休假暫停賣樓一日，齊齊去觀禮兼去飲，認真畀面。
九倉助理董事黃光耀解釋，由於乖女出閣係梁Sir嘅人生大事，一場同事多年，都為佢高興，所以破天荒決定，全線新盤售樓處當日休息一天，等同事可以全程盡情參與梁Sir嘅嫁女婚禮。大日子係幾時呢？就係嚟緊嘅星期三，即係十七號，想買九倉樓嘅讀者，就要記住呢個特別嘅日子，唔係到時摸門釘就無謂啦。
講番梁Sir，今日起會放一個禮拜大假，佢噚日喺擎天半島售樓處，收到好幾份賀禮，黃光耀就送咗條口水肩，免得梁Sir外父見女婿，流口水喎。中原劉大姐就贈名酒，飲得杯落咁話。
今年樓市喺中秋節大翻身，代理同發展商自然四萬咁口，做到生意，荷包腫脹，會諗擦番餐好嘅，中原一眾高層，早幾日同華懋吳崇武，喺一間五星級酒店嘅馳名鐵板燒餐廳過節，食品包括大頭蝦、龍蝦同帶子，諗起都流口水。
吳生當日重送咗份過節禮物畀中原，就係淺水灣豪宅129淺水灣嘅夜景相片，明月高掛映照下，物業流線型嘅外觀，顯得非常獨特，意境構圖重夠晒應節㖭。蘭西就覺得，吳生好識把握宣傳機會。
中央放寬內地人自由行來港限制，一時間大量旅客湧入香港，搞到酒店房間供不應求。其實，好多內地客都唔介意住得差一啲，留番多啲錢購物，所以賓館生意應該重好景。但係有商機都要識爭取，因為內地客唔知邊度有平價賓館。
蘭西最近經過佐敦，見到彌敦道馬路邊有塊賓館廣告板，列明房租價錢同電話，相信係等啲內地客經過睇到幫襯，果然夠醒目。蘭西查過，間賓館就喺個廣告板隔籬。
明星參觀示範單位，已經唔係咩新奇事，舊年底買入尖沙嘴擎天半島嘅才女施念慈，噚日現身長沙灣宇晴軒喺佐敦嘅示範單位。蘭西聞風，即上前了解施小姐今次嘅來意，點知負責嘅經紀，竟然搖身一變成近身護衞，喝止一眾記者採訪拍照，使唔使咁惡呀？！
反觀施念慈全程面帶笑容，重好大方企定定回答記者問題，佢話：「今日嚟睇吓先，未知會自住定投資。」當被問及對樓市睇法時，施小姐樂觀咁答：「樓價應該會上，自己會再睇吓其他樓盤，好似薄扶林貝沙灣、鴨脷洲深灣軒等。」唔通佢又想掃貨？
發展商想賣多啲單位，都會搵代理幫手，重搞好多比賽推動佢哋努力搵客，例如促成某一宗數就可以跳bar。由於每跳一個bar，佣金會多好多，所以代理千方百計都會爭取多啲成交，部份甚至會貼錢畀買家，即係唔使畀佣重有錢收，背後原因係湊夠條數，跳到bar計重有着數。估計發展商都知道代理呢啲招數，但就冇行動，背後原因係乜，唔使講都明啦。
蘭西
電郵地址：
