電影《西遊記之月光寶盒》中，有以下一段對白，周星馳演的孫悟空曾對紫薇仙子說：「曾經有一段至死不渝嘅愛情放喺我面前，而我冇去珍惜……」當年飾演紫薇仙子的朱茵今日面對的一段感情，雖然與當年的時、景、人已截然不同，但面對今日身邊的男友黃貫中，更令她相信至死不渝的愛情。
朱茵說：「我信至死不渝，因為我迷戀愛情，唔會話同一個人淡咗，只不過係懶咗。呢方面我做得好好，起碼我成日都引到阿Paul笑，因為我鍾意睇佢笑，佢笑令我好開心；每一日我同佢通電話又好，見面又好，但我都覺佢有新嘢。我覺得佢係最好嘅填詞人，佢嘅詞好有力量去抒發一樣嘢，佢唔係刻意花巧，好切合佢音樂。你問我邊個係最好男歌手，我會話係阿Paul，我唔怕醜，因為係真心。」
拍拖數載，感情如膠似漆的他們，雙方均已認定對方為終身伴侶，但當問及朱茵何時結婚？她即打趣地說：「未咁快諗呢樣嘢，我太多嘢想做喇，我覺得女仔要擁有自己嘅生活先可以嫁。結婚係一件好嚴肅嘅事，同另一個人開始另一頭家，如果我結婚嘅話起碼要放半年假，但都唔得，我唔需要咁趕住去建築家庭！」
訪問末段，朱茵表示最欣賞的唱作人是戴佩妮和范曉萱，而她在新碟中亦有嘗試填詞，她坦言正打算朝唱作人方向進發，朱茵說：「我唔識樂器，不過我曾經諗過用錄音機錄低啲旋律畀阿Paul，但佢話咁唔得，我唔識做成隻歌出嚟，我咪話：『好，我去學。』」朱茵不諱言會繼續自資出唱片，但她笑言自己較一般新人幸運，不用一碟定輸贏，因為她還可以接戲拍廣告賺錢去注資投入自己的夢想，繼續織夢。
撰文：馮美茵
攝影：甄朝健
化妝：KarenChoi
髮型：ILColpoJacksonYung
場地：蘭桂坊CClub 服裝提供：連卡佛
