上個禮拜喺沙士同911兩周年左右夾擊下，恒指跌番落萬一點樓下，近排炒得好好哋嘅股仔都好似散晒咁，正如之前批完股諗住重有後着嘅中聯系統（757），一個沙士就即刻令到個價跌穿批股價，隻股上個禮拜沽壓唔細，不過時不時都見到有大買盤出嚟，尤其係到9毫子邊企穩時，買盤就更加明顯，上星期四已升番去1.01元收市，聽老友講，隻股應該重未玩完嘅，可以繼續留意吓。
其實重有好多隻股仔表現唔錯，好似做忍者龜做到出晒名嘅彩星集團（635）咁，雖然喺頭兩個交易日跌咗唔少，但喺上周四收市已升番去個四樓上㖭。伏勝問行家隻股發生乜事，行家話原來隻股之前公布上半年營業額升咗一倍三後，即刻有幾個外資芬佬對佢哋隻股好有興趣，想搵個好價入股。
今年美國經濟好轉，彩星接咗唔少大型快餐連銷店嘅柯打，聽講全年業績好好，有機會派發豐厚股息，所以已經有好幾個基金表示有興趣。聽講管理層會喺10月頭先見亞洲區嘅芬佬，遲啲重會去埋花旗國做路演。
自推出香江自由行以來，好多隻有自由行概念嘅股都受到炒家嘅追捧而跨鳳乘龍，隻恒豐金業（870）係今次新政策下嘅大贏家之一，唔少人非常睇好佢哋，話佢哋上個星期跌市中，股價無跌穿20日線，應該可以睇2蚊。雖然隻股由低位已經升咗成倍，但由於之前配股批貨已經歸邊，再升都唔係冇可能。
伏勝