鄭裕玲（嘟嘟）和前政務司司長陳方安生日前到了老撾進行親善探訪，經過六日共處，嘟嘟欣賞陳太的學識和愛心，並希望以對方為學習目標。嘟嘟更指陳太為當地小朋友落淚。
鄭裕玲和前政務司司長陳方安生日前應聯合國兒童基金會邀請，隨團到老撾探訪。
嘟嘟首次跟陳太到落後地方探訪，二人相處愉快，嘟嘟昨日在電話中說：「我同咁多人接觸過，我覺得陳太為人好叻又醒目，佢對當地小朋友真係好有愛心同熱心，陳太對佢哋好似一家人咁親切，佢見到啲小朋友咁可憐，重感動到喊起上嚟。」
嘟嘟在出發前帶備了不少藥品、食物和日用品往老撾，她說：「去到老撾先知嗰度真係好落後，又冇電又冇水，人民除咗窮之外，知識水平都好低，尤其唔識節育，有啲媽咪重生成十個仔女，但屋企又照顧唔到佢哋。
「我哋又去咗當地嘅醫院，嗰度唔似我哋咁先進，去醫院竟然要行四日四夜，你話幾咁得人驚。我哋亦探訪咗當地嘅愛滋病患者，都有同佢哋握手接觸，希望可以帶啲溫暖畀佢哋。」
嘟嘟在離開前把用剩的物資留給當地貧民，她說：「當日我帶咗一篋嘢去，到返嚟只係攞咗一個旅行袋，我覺得好輕鬆。」
問嘟嘟此行學到甚麼？她說：「我體會到教育對一個國家嘅發展真係好重要，所以我好鼓勵人要不停為自己增值，我唔介意下次有機會再去做同類型嘅探訪。」
嘟嘟為此行令她更珍惜現在所擁有的一切，她說：「我未必會領養小朋友，但就一定會捐錢到慈善機構去幫助有需要嘅小朋友。」
採訪：比華利
