女友來港　我去大馬？
華仔：咁咪向左走向右走？

最近有周刊指劉德華的大馬女友朱麗倩來港和華仔度中秋，但華仔中秋節則在大馬工作，對於傳聞，華仔說：「如果我有個大馬女友，佢中秋去香港陪我過節，我就走去大馬做嘢，豈不是變咗向左走向右走？」

出名勤力的劉德華，大前日中秋節正日去了大馬做電影《大隻佬》簽名會，前日一早由大馬返港後，立即趕去深圳宣傳，十分忙碌。

「保持神秘感」
香港《大隻佬》宣傳海報，是華仔背面全裸，但在大馬海報只可以現上半身，至於跳豔舞戲份是否要刪剪，則仍未清楚。
最近有周刊影到劉德華和大馬女友朱麗倩一架車兩份用，還指朱麗倩返港和華仔過中秋，大馬記者見到華仔，即把握機會問他會否去「娘家」探望，華仔即刻笑着反問記者何處是他的「娘家」，他說：「會有人咁做咩？如果我有個大馬女友，佢中秋去香港陪我過節，我就走去大馬做嘢，豈不是變咗向左走向右走？關於我嘅感情生活，我都係一句無可奉告，如果結婚一定會通知大家，不過重未出現一個一生一世嘅對象之前，就等我保持吓神秘感先，費事將來有變，因為世事難料。」

Fans備齋菜
華仔此行共簽了過千個名，可以說是簽到手軟。他又和二百個大馬fans聚會，加上這個月二十七號是華仔生日，故當日收了兩個蛋糕，可惜華仔每逢初一、十五食齋，連蛋都不能食，所以無福消受，幸而fans細心，一早為華仔準備了很多齋菜，更有fans特別叫母親自製月餅送給偶像，令華仔十分感動。