今個星期隻《高達：相逢宇宙篇》，可用「少到飛起、炒到離譜」嚟形容。鬼咩，套限定版成個秋葉原夾埋都冇三百盒，正牌係僧多粥少，所以香港平均炒到成千五蚊盒都唔難理解，之但係日本呢面都唔輸蝕，二手價賣到三萬至到三萬九千日圓不等（即係二千到二千七港銀左右），而二手舖嘅一哥TRADERS就標到明收一萬八千日圓，即係千二蚊左近。另一間MEDIALAND就收一萬九千日圓，講句衰啲，玩到飽晒再拎去放都賺到隻新Game返嚟。
雖然套限定版一早斷晒，但係普通版去貨一樣係去到洪洪聲，原因係BANDAI已經話明唔會再出第二批貨，所以呢幾日我都見好多買唔到限定版嘅㗎仔機迷，黑口黑面咁樣拎隻普通版埋去收銀度畀錢。