全港率先金碟測試：<br>《亞克傳承：精靈之黃昏》全3D登場

全港率先金碟測試：
《亞克傳承：精靈之黃昏》全3D登場

PS年代人氣之作《ArctheLad》，化身第4集《亞克傳承：精靈之黃昏》登陸PS2，故事天馬行空，加埋全中文介面及全3D畫面，覺得佢真實之餘，故事重有血有肉。

記者、攝影：野狼

發售日期：9月25日
行貨售價：$238
開發：SCEI
類型：RPG
機種：PS2
(c)2003SonyComputerEntertainmentInc.

《ArctheLad》頭三集都係PS主機嘅作品，今次首度登上PS2平台之上，並定名為《亞克傳承：精靈之黃昏》，筆者有幸作全港金碟率先測試，一開Game真係不得了，全中文遊戲介面，對於RPG遊戲嚟講非常重要，令玩者輕易掌握遊戲發展之餘，又可以加深劇情嘅理解，唔使再一味靠「攻略雞精書」爆機，打落真係實在好多，人物故事有血有肉好多！

人魔雙線發展
今集《亞》的故事背景距離上集約一千年後，當時世界資源已經消耗殆盡，新發現的能源「精靈石」可以解決這場危機。人族及魔族本已是世仇，今次重為能源搶奪問題，關係更形惡化！不過遊戲最過癮之處，係玩者在人族、魔族故事進行雙線發展，令玩者可以在同一時間，從兩種截然不同角度，觀看同一件事件！老土啲講句即係「公說公有理，婆說婆有理！」不過唔係好多人明㗎咋！

■雖然遊戲未見街，不過今次都可率先測試金碟版本。

■跟Game附送限量版紀念砌圖一幅。

3D介面策略地形
遊戲擺脫前三集嘅2D設計，起用3D立體遊戲介面，而且好似人族的城堡、濃密的樹林、奇幻的魔族市集，全部都係經過精心布局，充滿電影感！另外，場景設計屬全3D地形，所以作戰環境變得有高低及障礙物，遊戲進行時可以設「計」，引誘敵人分散戰力，逐個落單擊破。

■呢隻Game都有「養仔」系統，可惜造型麻麻。

■除咗殺敵升LV外，新加了武器、盔甲、飾物等配備。

■人物可動及攻擊範圍全部以圓形陰影表示，自由走動自由調校。

■人物位置相近，有機會引發超華麗的合作攻擊技。

同場加映：海港城任試新Game
最近SCEH為慶祝PS2全球銷量突破5,000萬部，由即日起會喺尖沙嘴海港城，擺放10部PS2，當免費機舖畀所有機迷任玩！所有遊戲都係剛出街嘅勁Hit新Game，包括《高達：相逢宇宙編》、《GUNDAMSEED》、《櫻花大戰：熾熱之血》、《頭文字Ｄ》及《TOD2》中文版等！如果行開尖沙嘴，冇理由唔玩兩嘢啫！

日期：由即日起至10月31日
時間：每日早上11:00至晚上8:00
地點：尖沙嘴海港城海運大廈3樓301舖