雖然巴塞隆拿喺季前得到新會長拉樸達上場，斥資買入幾位球星加強實力。但咪睇佢哋好似好風光，上季爭唔到歐冠盃參賽資格，實際上𠵱家都係艱苦經營中；最近重傳出要減薪，希望唔好影響佢哋今晚聯賽作客對阿爾巴塞特嘅士氣啦！
據報指巴塞隆拿將會首先向謝列特「開刀」，謝列特本人亦可能因為長坐冷板櫈坐到無晒狀態，心知唔妥協嘅話都未必走得去邊，日內應該就會同球會簽減薪後嘅新約。
而球會跟住準備傾嘅，竟然係隊長佩奧爾同埋安歷基！呢兩個可以話係主將，我求大俠覺得如果真係要節流，郁第二啲「冗員」先好喎！
巴西4R舊年幫巴西再捧世界盃，享負盛名，但卡洛斯最近就公開承認已經同老婆離婚，步朗拿度同李華度後塵；而卡洛斯話𠵱家無諗過再婚，只係想繼續球員生涯同埋養育三個子女。我求大俠都估唔到，4R中三個結咗婚嘅最後都離婚收場，真係場內場外都咁有默契。
皇馬自從中場馬基列尼走咗後，防守中場位就由金比亞素頂上。呢個阿根廷仔最近表示希望隊中幾位中場老大哥施丹及費高等，以後唔好淨係掛住攻，要多啲返後幫手喎！咪畀我求大俠估中，金比亞素咁講係想拖埋施丹同費高落水，將來有鑊齊齊孭，真醒目！
球員轉會市場已經關閉，但係車路士買球員計劃依然停不了，有傳利華古遜巴西後衞盧斯奧會短期內簽約，明年一月報到，利華古遜就同意放人。依我求大俠所見，其實車路士可以出錢同盧斯奧贖身，等佢變成自由身球員，隨時過檔，但咁樣個轉會制度就形同虛設囉！
AC米蘭李華度終於表示希望離隊。雖然李華度𠵱家同AC米蘭有約在身，不過當日佢從巴塞隆拿過檔AC時，都係自由身唔使轉會費。照計AC米蘭𠵱家亦好樂意同一個「高薪大後備」解約，以自由身轉會。我求大俠覺得佢過去英超會有幾好發展，即管睇吓佢嘅造化！