香港人向來一盤散沙，快閃黨登陸香港個幾月都未成氣候，噚日佢哋再次出動，約定下午四點二十五分喺銅鑼灣地鐵站A出口票務處「起義」，今次指定動作係蹺埋雙手扮等人，八方四點左右到場諗住湊熱鬧，點知夠鐘時都只係得十幾個人喺附近徘徊，好似記者重多過快閃黨咁。
終於搭正四點二十五分，真係有十幾個睇落未夠二十歲嘅𡃁仔蹺埋手企喺度，之後大家拍拍手就一哄而散，無聊？係咁㗎啦。八方手快拉住個叫Marlon嘅BBC傾兩句，佢話十月放完暑假就返英國升大學，今次係第一次參加Flashmob，「引到咁多記者來採訪，我覺得已經好成功。」
另一位自稱係香港快閃黨中堅分子嘅阿榮就話，參加快閃黨嘅人都係「朋友少、孤單同被人冷落、生活唔夠精采」，佢自己就想藉此認識新朋友，不過佢話：「後生仔就會識囉，年紀大嘅就冇興趣嘞。」
（圖）Patrick同Marlon（右）都係首次參加快閃黨。
傳真︰2623-9278
電郵︰