新車速報：<br>豐田AlphardS-Edition變得更豪

新車速報：
豐田AlphardS-Edition變得更豪

甚具生意頭腦嘅獨立車行，經常會為不同車款加裝配件，以吸引買家注意；最近某大車行，特別為豐田Alphard推出S-Edition特別版，勝在外形吸引之餘，新增多項豪華配備，更會係賣點所在呢！

記者：鄭達基　攝影：陳偉林
逢星期一至日出版

跑車化賣相型到盡
本身已擁有一份懾人魅力，並走豪華MPV路線嘅豐田Alphard，有不少車主都會為其加裝一身跑車化包圍，務求令部車望落能增添有一份活力感；而呢部全新AlphardS-Edition特別版亦唔例外，有關車行亦為其裝上全車包圍，響17吋跑車合金胎軨組合襯托下，望落真係好有一份跑車氣息；而屬Xenon燈配搭嘅一對頭燈，匹配原廠霧燈組合，亦能有助增強晚間行車安全性。



全新皮椅坐得舒服
至於車廂方面，亦能予人一份寬敞闊落嘅感覺，前後三排乘客都可擁有充足嘅乘坐空間，加上座椅全改由高級羊仔軟皮縫製，乘坐感明顯要較一般真皮座椅為高，嗰份妥貼舒適嘅乘坐感受，實在係筆墨難以形容；與此同時，呢部AlphardS-Edition特別版，亦增設有雙電趟門及透光門枕板，乘客上落車時亦見輕鬆得多。設備亦見齊全易用，而且重有多個安全氣袋，以確保車上乘客嘅安全㗎！

■一對Xenon大燈襯以原廠霧燈組合，照明度十足。

■車尾頂翼連High-mount煞車燈，既安全又有點綴作用。

■座艙鋪排簡潔清晰，而半皮半桃木軚環亦予人十足把持感。

■新增雙電趟門組合，乘客上落更見方便。



3.0V6偈輸出狠勁
與大部份在港發售嘅豐田Alphard一樣，呢款S-Edition特別版，都係以一台3.0公升V6DOHC引擎作主要動力來源，除動力輸出充裕外，加上豐田獨有嘅VVT-i技術輔助下，重會有低耗油量及運轉寧靜嘅好處；另外，新車更備有一套電子液氣壓懸掛系統，駕駛者可按路面需要，選擇不同嘅吸震模式，從而令行車舒適度有所提升呢！

■全車座椅用上高級羊仔軟皮縫製，手質感高之餘坐落亦見舒適。

■中控台上有齊原廠冷氣及雜物匣，另外重預留有音響組合位置。

■一套4前速自動波轉檔靈敏暢順，得以讓引擎發揮至極。

■全新透光門枕板組合，好有一份吸引力。

小檔案
豐田Alphard3.0S-Edition
引擎：2994ccV6DOHC
馬力：220ps/5800rpm
扭力：31.0kgm/4400rpm
尺碼：4845×1830×1935mm
軸距：2900mm；車重：1850kg
新車售價：$469,000
車輛提供：富利堡汽車（23330747）

■一台3.0公升V6偈響VVT-i技術輔助下，輸出強勁之餘又見慳油及運轉寧靜。

記者簡評　增設備添魅力
向來被譽為係「流動豪宅」嘅豐田Alphard，今回增設有雙電趟門、高級皮椅、透光門枕板等豪華配備，明顯將車子嘅魅力升級，而一台3.0V6偈除輸出充裕外，加上電子液氣壓避震，絕能迎合不同路面需要呢！