朱茵將推出自資的第二張唱片，立志成為歌星的她，任憑如何努力，外界仍將注意力集中在其驕人身材上。然而對音樂抱着滿腔熱誠的朱茵卻一臉不在乎地說：「我唔會理呢類人，因為佢哋根本唔會聽我嘅音樂。」
當現今樂壇被形容為張三李四也出來分一杯羹、只要會說話也可成為歌手的時候，有樣貌有身材的朱茵亦不甘示弱，即將推出她第二張自資的唱片，銷量如何對她毫不重要，只渴望贏得口碑，只因一心要成為歌星的她只對音樂充滿迷戀。
朱茵日前在中環接受記者專訪時說：「每個人都會對某些事件、物質或人有迷戀，可能係對鞋，或者沉溺於失戀入面，但我嘅迷戀係單向，就係音樂。好多人唔明我點解喺經濟不景、唱片業走下坡嘅時候仍堅持做自己嘅音樂，係因為喺呢件事嘅過程中我會開心。我自細鍾意同人分享感覺，但做戲嘅情緒表達只係做人哋嘅故事，雖然我嘅內心世界可以透過傳媒抒發，但只係好片面，我覺得藉音樂去表達自己個人對人生睇法、處事態度個感覺好奇妙，好實在，令到人好開心、好雀躍同熱血沸騰。」
外界或者會這樣的認為：朱茵身邊有一個對音樂有抱負的男友黃貫中（Paul），才令她突然對音樂熱愛。朱茵一臉不在乎地說：「我唔介意人哋咁講，個腦係佢嘅，慘得過我重有音樂可以抒發。雖然人言可畏，但唔重要，我唔會因為你講兩句而食唔落飯，或者賣少兩隻碟。你講得呢句說話根本冇聽過我嘅音樂，所以我唔會理呢班人，如果有認真聽我音樂嘅人就知我同阿Paul係唔同類型。」
朱茵續說：「或者可以咁講，阿Paul嘅出現令我更加相信我諗嘅嘢行得通，我係可以做到，不過男朋友最多係支持，會畀多啲音樂類型我聽，我唔使用好多錢就聽到正嘅音樂，身邊嘅人只係一盞燈。點解唔可以諗吓，其實係兩個志同道合嘅人因為興趣相近先走埋一齊呢？」
下個月踏入三十二歲的朱茵，九一年演藝學院畢業，隨即加入無綫主持兒童節目，九五年在澳洲拍攝郭富城音樂特輯，穿着三點式泳衣演出，令35D豐滿上圍曝光，此後，朱茵的新聞與接拍的電影開始與她的身材扯上關係。朱茵直言最初頗介懷，她說：「我有介意過，但呢樣嘢對我嚟講係最自然不過，我又唔覺自己有乜嘢出眾，我身邊有啲人重誇啦，唔係一件咁大不了嘅事。」
九八年朱茵演出電影《強姦II之制服誘惑》，自此她的角色被認為是賣弄身材，她反駁稱戲中她是飾演一位剛陽味甚重的女警，只是傳媒將焦點集中在她的身材上，才認為她賣弄性感。朱茵說：「如果你哋認真去睇我嘅戲，我根本冇做過賣弄身材嘅角色，只係因為一張相，就講到成套戲都好似嗰張相咁，由佢囉。就算𠵱家拍緊嗰套《性感都市》都只係個題材講性，都唔係sell身材㗎，老實講少少嘢就嘩然，根本唔使入肉。我唔會再花時間去照顧一班唔睇我嘅戲嘅人，根本浪費我精神同時間。」
