立法會就快復會，加埋區議會選舉殺到埋身，班立法會議員已經陸續返港嚴陣以待，不過李卓人好快又要飛去台灣，聲援當地國營工會十月發起嘅示威，當地有傳媒將李卓人捧到上天，話佢係7.1遊行靈魂人物，又話佢去台灣指導人哋示威。
八方打電話賀阿人衝出香港搞遊行，進軍寶島，阿人一聽到立刻話唔好搞錯，佢之前應對方之邀，寫過篇文講私營化對工人嘅影響，對方請佢去聲援下，講到指導人示威更加唔敢講，因「行內人」都知，喺亞洲搞工會遊行，南韓、台灣認咗一、二，冇人敢認第三。
不過，阿人𠵱家重有一樣嘢驚，就係怕新財爺唐公子真係用幾億拎個世貿會議返香港搞，事關一搞親呢個會，全世界工會、反全球化、反自由貿易示威人士一定來香港，以往慣例就會由當地工會招呼食住，粗粗地計一萬幾千人一定有，佢哋又一直同工盟聯絡開，阿人話佢邊有咁多錢招呼呢班外國友好！講講吓有人獻計叫阿人搵孫公借幾座空置居屋頂住，有人重話不如介紹佢哋搵工聯會，人哋不止有銀，講到示威，佢哋重可以搞到拎勳章，應該照顧吓外國工會。
傳真︰2623-9278
電郵︰