投資推廣署邀請「滾石」、「桑坦拿」等來港，費用驚人，要承諾包底八千萬，的確係本地音樂界聞所未聞嘅天文數字。其實香港音樂界都幾慣邀請老牌歌手來港，如披圖梁搵過「比知」，樂仕搵過ONJ、奇里夫李察、彼得保羅瑪莉，以至最近嘅「荷西菲里士安奴」，都搞得好成功，BerryGibb未去世之前，披圖梁曾斟過「比知」再來香港開演唱會，聽講開價一百五十萬美元，嚇壞咗披圖。如果當時有「投資推廣署」包底，披圖就發咯。
對外人十分爽手，對本地歌手就講社會責任，講愛國，要求黎明、許志安、謝霆鋒等等唔好收錢，免費演出，所以有啲藝人覺得好委屈，條氣唔係幾順。
餐廳羅就對左丁山講：「大歌星來港，只係刺激一時，本地人要本地樂壇有生氣，最好支持一下長期喺香港演出嘅樂隊。嗱，如果你喜歡爵士音樂，記得九月二十號星期六晚去怡和大廈地庫嘅Grappa'sCountry聽TheAllenYoungbloodJazzSeries2003，表演者有Allen同埋AlexiaGardner嘅樂隊，聽一晚，收350蚊包括兩杯飲品及『任你食』(allyoucaneat)菜譜，一於約埋朋友去fever吓啦！」咦，星期六晚要睇英超聯噃，點揀呀？餐廳羅話：「總之各適其適啦，唔鍾意睇波嘅朋友就落嚟聽音樂，香港唔係咁多爵士樂隊演奏㗎！」