許志安近排出新碟又開演唱會，所以頻頻搞活動宣傳。噚日安仔就喺銅鑼灣名店坊舉行簽名會，不過因為遇上維園花燈會，加上又係禮拜六，人頭湧湧，喺警方要求下，簽名會嘅場地被迫由原來嘅露天靚位，改喺商場室內地方舉行。
安仔同在場歌迷大玩遊戲，其中最好笑係由fans幫安仔嘅巨型紙板公仔裝身，古靈精怪乜都有，最後由將安仔扮成SM武士look嘅fans勝出。
安仔又同歌迷踢波、唱歌，最後重簽咗四百個名，足足搞咗兩個半鐘頭。安仔咁辛苦，梗有即時回報，唱片公司請咗兩個着比堅尼嘅火辣models陪住安仔，佢哋一個用手掩住安仔雙眼，另一個就餵佢食月餅，真係豔福不淺！
問安仔點解中秋節唔陪梅艷芳，莫非因為緋聞女友鄭秀文在場？安仔話：「我唔想有狗仔隊，同埋我要背歌詞唔得閒，阿梅都有打過畀我催我去，我已經買咗個IQ博士燈籠畀佢，不過未送到。」
前日係張國榮嘅生忌，噚日依然有來自世界各地嘅歌迷去到哥哥屋企門前憑弔一番，其中一個日本fans，相信是因為太掛住哥哥，臨走前居然喺花槽嗰度掹走咗一棵草。
呢位咁癡心嘅fans事後解釋話想將呢一棵草帶番去日本種，咁樣代表佢對哥哥嘅思念會延續落去，佢重話希望其他fans可以原諒佢咁做喎，嘩，好彩佢冇攞埋唐唐返日本啫！
關心妍（Jade）噚日喺旺角出席新城活動，講起瘦身，阿Jade自爆入行之後個胸細咗，佢話：「最高峯期有DCup，𠵱家就介乎B同CCup啦。」
Jade重叫啲女仔唔好跑步太多，因為會令個胸鬆弛！嘩！原來阿Jade人仔細細，都曾經有DCup，真係估唔到！
周星馳（左一）套電影《功夫》自六月喺上海開拍以嚟，一直嚴格地遵循日程表，日以繼夜係咁拍，但上海高溫嘅天氣同接踵而來嘅雨季，令拍攝工作帶嚟唔少困難。周星馳於是就喺中秋節嗰日提早收工，成班人到餐廳食上海名菜，又大玩抽獎。唔知當日于文鳳有冇去呢？
哥倫比亞電影有份投資，並由內地影帝姜文、趙薇、日本影星中井貴一主演嘅內地電影《天地英雄》，噚日國家廣電總局宣布呢套戲會以中國官方名義，報名參加下年奧斯卡金像獎，競逐最佳外語片。
唔知趙薇會唔會好似《臥虎藏龍》嘅章子怡咁幸運，揚威海外呢？
