今屆法蘭克福車展上，不乏具創意又見吸引力嘅新車同概念車款，當中法國標緻、瑞典紳寶、德國歐寶同意大利愛快，都值得車迷細看一番㗎！
記者、攝影：陳偉林
呢款307車系中嘅新作，相信早就有唔少車迷留意到佢嘅消息，但總不及現場睇來得真實；論氣派同講究程度，較同廠另一款206CC可謂截然兩樣，好有大型Roadster風采。
咪以為柴油車只限貨車類，查實歐洲車廠對柴油引擎研製甚有心得，亦得車迷廣泛支持，加上頭、中段表現特別凌厲有勁，裝上呢部概念跑車身上亦無不可。而407Elixir裝載係一台2.7公升HDiV6柴油偈，馬力201匹同44.9kgm峯值扭力，匹配上保時捷Tiptronic半自動波箱，演繹非比尋常。
呢部開發自2002年、並於同年9月下旬發布過嘅新一代概念跑車，滿載前衞思維同概念，能否有朝正式投產，大家不妨拭目以待。
同級車林林總總，要突圍而出除咗本身能夠動靜皆宜夠全面外，咁出位嘅外形又點可以欠奉呀！
愛快善於研製跑車類，惟生產豪華轎車的話，略嫌拘謹欠創意；然而，佢哋替166推出Facelifted新版，一份純悍拉丁跑車氣息，登時油然再現。
全新9-3車系賣相灑脫吸引，連帶呢部新款9-3開篷都唔例外，絕對係新派型男索女嘅至佳座駕。
展場中套用上英國姐妹廠Vauxhall名字嘅概念Roadster，開發自英國GMAdvancedStudio，短小精悍嘅車身內裝有一台2.2公升Supercharger引擎，輸出高達240匹咁多㗎！
大家有見識過福士Golf同奧迪A3新車嘅風采，查實同級嘅Astra新車亦有破格創新嘅造型，加上有多台引擎作選擇，相信日後亦不乏車迷追捧呢！
一部高性能跑車唔單止要性能突出，重要有一個吸引講究嘅造型，加上出眾嘅車門設計，令擁有者亦感同身受㗎！
雖然唔少人認為SUV市場接近飽和，但只要有條件，設備入時又夠In的話，加上近乎天幕式玻璃車頂，以及多項戶外活動裝備，賣點便油然而生。
