照道理，我那麼鍾意周潤發，1987年《江湖情》上映時，必定捧場，奈何，當我拿着這隻DVD時，居然全無印象！回家看後，戲內沒有發哥的威武形象，沒有風趣對白，連主打的槍戰戲份，也與萬梓良相若！失憶皆因這不是發哥的一齣好戲！
不過睇番戲中劉德華和譚詠麟當年的青春後生樣，都好有趣。
記者：梁佩芬 攝影：陳偉強
鳴謝：樂悠網
《江湖情》係講萬梓良同劉德華點樣一齊跟周潤發行江湖，但因萬子有私心，出賣發哥，最後當然講到發哥點同華仔點英勇去剷除異己，一貫江湖片的調子！有人話《江湖情》係《英雄本色》的延續，但我覺得發哥個造型似賭神Look多啲，尤其那Set到「行」的頭髮、着西裝及玩銀仔，都極似後期的《賭神》，不過就瘦啲！
都係經典鏡頭
同場加映
新一代鐵漢
我們有十幾年都一樣又型又打得的發哥，鬼佬片一樣唔少得這類打不死的英雄，光頭佬雲狄素（VinDiese）算是新一代荷李活鐵漢，好過睇嚟睇去都係布斯韋利士，但演技有待改進，不能單靠永遠打不死的英雄形象支撐，否則就會變成第二個史泰龍！《火遮眼》講美國特警與哥倫比亞大毒梟鬥法，例牌的奇情、暗殺、卧底及火併，再加上生硬的談情跳豔舞，不過熱熱鬧鬧，無聊時睇睇都唔錯。
驚到要搬屋？
新戲《向左走．向右走》中，梁詠琪要繙譯波蘭的恐怖小說，因為太驚，搞到要搬屋，不知道你看過恐怖大師史提芬京的改編電影《漏網之靈》後，會唔會驚到唔敢返屋企？開頭，戲有點悶，又無乜驚嚇片段，但勿心急，去到中段，四位主角重聚後，變得緊湊，又加了強特技效果，尤其「困獸鬥」一場，原來一共用了四百個鏡頭合成的！
幾時上映過？
對此片毫無印象，幾時在香港上映的？冇所謂啦！奇怪是此片在Yahoo的影評有A-，但美國報章的影評就得C+，相差咁大？故事講一名熱愛七、八十年代情歌的美女，突然被捲入一單謀殺案，居然在等候審訊期間，同時愛上兩個人，美女如何能一邊談情，一邊為自己洗脫嫌疑呢？
