盛傳與英皇唱片公司反目的陳冠希（Edison），昨日跟緋聞女友趙頌茹（Yu）同台出現時互相迴避。惟事後Edison否認迴避阿Yu，指阿Yu是好女仔之餘，更語出驚人着阿Yu要提防身邊人士，明顯衝着英皇而來。
陳冠希（Edison）、趙頌茹（阿Yu）、余文樂和杜汶澤，昨日一起到旺角新世紀廣場出席《無間道II》的中秋追星日活動，當四人上台與觀眾打招呼時，Edison刻意與一度傳出緋聞的阿Yu分開站立，未見他跟阿Yu打招呼和作眼神接觸，另方面，阿Yu雖然與身旁的余文樂傾偈講笑，但亦偶爾偷望Edison，二人明顯地在互相迴避對方。
事後記者追問余文樂何以只顧跟阿Yu密斟時，余文樂解釋說：「大家都係同期新人，所以比較好傾啲啫。」而阿Yu亦跟余文樂同一口脗說：「雖然我哋冇合作過，但大家係同期新人，成日一齊出席活動，所以好傾啲。」
問到阿Yu跟Edison是否因為緋聞而刻意避忌，在台上分開站立時，阿Yu連聲否認道：「出場係咁安排啫！我走埋去又話我專登走埋去，唔走埋去又話我哋冇偈傾，根本唔係緋聞問題，總之喺台上我做番自己本份啦。」
對於是否因為怕緋聞而對阿Yu諸多避忌，Edison連聲否認說：「我唔覺得係緋聞，點解要避忌？其實呢個問題你哋應該問番佢公司（Musicicon）先至啱，問佢有冇尷尬；我知阿Yu係好女仔，但就要小心佢身邊嘅人囉！」Musicicon為英皇附屬公司，與英皇仍有兩年多唱片合約的Edison仍敢膽公然批評公司，兩者間關係如何可見一斑。
採訪：何永寧 攝影：仇志德
