教育高官M升級冇耐就退休，聞者惜之，以佢嘅辦事魄力，推動科技教育有功，兼且能言善道，與教育界往來甚深，咁快退休，未免可惜，於是有好多傳聞，話佢與上司唔夾，做到冇癮云云。呢日喺沙田馬會碰到佢飲茶，問佢做乜唔do，有冇內幕。高官M話：「冇冇冇，只係自己有耳鳴之病，夜晚瞓唔到覺，日頭覺得唔舒服，西醫話我精神壓力大，中醫話我要補養身體，你有乜好醫生可以介紹吖？最後我覺得每日工作時間的確係長，咪以為做官好巴閉，其實好辛苦，為咗身體，決定退休之嘛！」退休之後，耳鳴如何？高官M話：「係輕咗，但未痊癒，我仍然尋訪良醫。」
高官M休息一陣啫，就畀校友會拉咗去做義務顧問，喺沙田搞「一條龍」，將大圍顯徑邨嘅張煊昌學校與馬鞍山嘅陳震夏中學呢兩間中大校友會聯會學校結成聯盟，張煊昌學校小六畢業生可直升陳震夏中學（或自行申請派位）。咦，如果陳震夏中學係好嘢，咁就對張煊昌學校學生好有利咯噃。聽一啲住喺雅典居、聽濤雅苑嘅老友講，陳震夏中學今年辦至中四，三年來聲名鵲起，想申請入讀中一，一年難過一年！
高官M出身中大，做義工都搏命過人，佢以前管沙官，經驗豐富，呢鋪搞中大校友會聯會學校結盟，應該游刃有餘。不過佢素來辦事落力，所以左丁山勸佢：「放鬆啲，身體要緊。」順便一提，各位讀者對醫治耳鳴有乜好介紹，請通知。