追月日公眾假期，老董兩公婆各有節目，董太日頭帶隊勞軍，老董晚上就連走幾場大騷，非常頻撲。噚日第一夫人率領政務司司長煲呔曾蔭權兩公婆、明星足球隊、應屆港姐、少女組合Twins、Cookies同性感偶像Yumiko等，一行四十幾人，去昂船洲駐港部隊軍營勞軍，佢哋節目豐富，打埋友誼波，直頭「玩」轉軍營咁滯。
據新華社報道，回歸後董太每年中秋前後都會入營勞軍，今年就有外交部駐港特派員楊文昌、中聯辦主任高祀仁、駐港部隊政委王玉發同司令員王繼堂做陪客。
貴客來訪，人民子弟兵使出渾身解數，軍樂隊在烈日下演奏娛賓，偵察兵則示範捕俘拳、捕俘刀、擒拿手反擒拿等絕技，見到大班戰士輪流嘭嘭聲咁被撻喺地上，嘉賓自然拍爛手掌。
解放軍咁落力獻技，香港則由黎明、Twins、Cookies同Yumiko去慰勞阿兵哥，三位港姐就擔當「獎品小姐」負責大抽獎，而明星足球隊同解放軍打咗場友誼波，明星隊輸三比六，董太發表講話時借題發揮，話香港人要學解放軍咁「站好崗」喎！
傳真︰2623-9278
電郵︰