車展速報：現場第三擊第60屆法蘭克福車展
福特新車多

響今屆法蘭克福車展會場上，除一眾跑車惹人注目外，多款適合家庭用嘅新車如福特Fusion及FocusC-MAX亦見受車迷歡迎。不如𠵱家一齊嚟睇吓，我哋現場直擊法蘭克福車展嘅第三炮啦！

記者、攝影：陳偉林

福特FocusC-MAX樣靚實用
全新福特FocusC-MAX除外形獨特吸引外，車內座椅更可按需要而作出變動，加上空間寬敞闊落，設備又齊全，絕能迎合家庭用家需要㗎！然而，家陣響大家眼前嘅呢部FocusC-MAX，採用上一台1.6公升引擎Duratec引擎作配搭，馬力輸出為100匹，用以驅動此車可謂綽綽有餘。

福特Fusion新配搭更吸引
雖然大家對福特Fusion應該唔會感到陌生，但於場內展出嘅新車卻有所不同，因車內及車身顏色選擇，全都屬新組合，望落倍見有一份吸引力；而分別係1.4公升（80匹）及1.6公升（100匹）引擎，除動力輸出充裕外，兼且重有低耗油量嘅特性呢！

福特StreetKa又一開篷小車
走開篷小車路線嘅福特StreetKa，除賣相保留有原來Ka硬頂版嘅神髓外，加上改用開篷設計，一份誘人魅力油然而生，當然重有齊全又易用嘅車廂設備配搭啦！

福特Visos輸出夠狠辣
屬概念車類別嘅福特Visos，廠方特別為其安排有一台3.0公升直6Bi-Turbo偈，馬力輸出高達350匹，性能表現絕對毋庸置疑，而其造型及車廂配搭亦見吸引呢！

越野路華Freelander新版更誘人
備受注目嘅新版越野路華Freelander，外形變動甚多，不但予人一新耳目之感，就連車內設備配搭亦見齊全易用，而頂級版一台2.5公升V6偈，亦見輸出充裕。

雅士頓‧馬田DB9火辣跑車
全新雅士頓‧馬田DB9高性能跑車，外形設計秉承車廠傳統，極富跑味之餘又帶點成熟韻味，而一台6.0公升V12偈，馬力輸出達450匹，匹配一套6前速半自動波箱，0至100公里加速度僅5.1秒，極速更高達300km/h咁快㖭！

雷諾Scenic最多載七人
向來備受家庭用家追捧嘅雷諾Scenic，廠方特別於會場內展出全新版本，當中一款GrandScenic，因位車身尺碼有所增加，故此除車廂空間來得寬敞外，而且重可以搭載七名乘客咁多㗎！