潮界金牌經紀人「魯祖鍾」又打電話嚟八卦，話題先由Rolex講起。佢話：「大食Jack，你啲料真舊，上個禮拜你講嗰隻50周年綠色『深瑪溫拿』一早已經大把人講，𠵱家女人街已經『率先』發售，五百蚊隻有交易。唔少日本仔知道後，即刻走落去狂掃貨！」但係呢啲表非常粗糙，一攞上手就知係假嘢喎，點解重有咁多人買？「魯祖鍾」解釋：「所以話你唔夠In，𠵱家啲日本仔已經接受咗假貨，甚至當佢係潮流。佢哋戴住隻『假撈』，唔係想呃人，反而係想話畀人知，嗱！我假嘢都照戴，重戴得鬼咁有型，咁就證明自己有品味喇。正所謂係『人戴表』，唔係『表戴人』！」乜有咁嘅學問？「魯祖鍾」果然識嘢，佢繼續：「𠵱家啲『假撈』已經出到自創Crossover款。好似GMT-Master圈搭『深瑪溫拿』表面，再加Sea-Dweller嘅殼；重有Cartier乘RolexExplorerI。你都咪話唔厲害！」
文：大食Jack