美國安然度過911，冇嘢發生，美股上升，昨日本港冇市，冇得反映美股隔晚情況。如果美股繼續穩定，星洲沙士事件再冇擴大，港股形勢雖然唔一定會大好，但至少都可以定住。
就算認為港股近期升得太急，要回吐一下，都唔應該揸啲Put輪，包括恒指Put輪，其中一個理由係溢價過高。個市如果真係跌落去，除非跌得好勁，否則Put輪唔易賺盡。
例如恒指Put輪9896與9898，年底到期，槓桿率的確好爆炸，不過溢價7.3%至9.8%，即係話揸到尾計，恒指要跌800點至1080點，先至打和，都未到話賺錢嘅地步。不過，如果忽然有一兩日，好似周二周三咁，則有機會賺到笑。
恒指Put輪中，比較值博嘅係9736，10月底夠鐘，輪價4.9仙，溢價2.9%，槓桿率25.1倍，數據較靚。如果某段日子睇淡大市，要博就博呢件。
藍籌Put輪，隻數最多嘅係滙豐（005），好多溢價都係10%以上，即係揸到尾要滙豐跌10元以上，先至有着數。
適當時機做適當嘢，某段時間睇淡滙豐嘅話，吼滙豐Put輪，最佳選擇係9043，不過唔係𠵱家買。滙豐牛皮至反覆向上，機會大過下跌。
章盛