噚日係張國榮（哥哥）嘅生忌，佢嘅親友同歌迷當然唔會忘記，前晚中秋節，一班朋友好似陳淑芬同佢個仔、蘇絲黃等人，去到哥哥生前位於加多利山嘅居所，陪伴唐鶴德聚餐，大家相聚到凌晨兩點先離開。
而噚日下午時分，除咗陳淑芬外，哥哥嘅家姐張綠萍同姐夫麥法誠，同兩個姨生女亦有到加多利山。到夜晚，上山詩鈉，肥姐同張艾嘉就先後到達陪唐唐食飯。
而哥哥來自世界各地嘅歌迷，分別喺唔同地方表示自己嘅心意。好似喺加多利山嘅居所門外，禮物同橫額多得連哥哥生前助手同其他人想出門口都好麻煩。一早就有近六十個嚟自日本、韓國等地方嘅歌迷到場送上鮮花、紙鶴、煙、紅酒等禮物放喺門口，亦有韓國歌迷喺白色布寫咗張「千手經」放喺門口。有二十個歌迷播住《月亮代表我的心》嘅手提電話鈴聲，邊播邊唱，而好多歌迷喊得好傷感，有一位七十九歲嘅婆婆，佢話當哥哥好似自己個仔，講講吓喊住跪到伏晒落地。
另外，亦有歌迷分別喺九龍灣國際展貿中心、灣仔會展中心同《金枝玉葉》取景地方藝穗會搞悼念活動，會場入面放滿好多哥哥嘅靚相，又播佢生前片段，有啲歌迷忍唔住傷心痛哭。而喺文華酒店亦有好多歌迷送上鮮花。
城中富豪大劉劉鑾雄捐咗二千萬畀科大，畀成績優秀嘅學生作為獎學金，據知大劉將件事交咗畀佢個仔劉鳴煒安排。大劉向來都鍾意做善事，馮仁昭聽講佢覺得最值得捐錢嘅就係教育呢瓣，重成日同朋友講，想搞好香港嘅經濟，要嘅就係人才，長遠一定要喺教育方面着手，相信佢係因為呢個信念先至捐咁多錢畀科大。
黃伊汶（Emme）噚日喺九龍塘出席「月光寶盒回收計劃」。Emme話前晚趁中秋佳節，同啲朋友去咗淺水灣玩燈籠，問到Emme有冇玩煲蠟？Emme就笑笑口話：「我啲朋友想玩，不過俾啲保安阻止咗。」此外，Emme今日會飛去日本，睇松任谷由實嘅演唱會，重預備咗幾萬蚊到時買衫㖭。
