劉慧卿做召集人嘅前綫聽日（十四號）舉行酒會，慶祝成立七周年，八方問卿姐，呢輪佢阿姐咁惹火，重會唔會有特區高官敢出席？點知卿姐話梗係有，梁愛詩同孫明揚都答應咗會嚟，對口局長林瑞麟呢？卿姐話佢不在港，所以派個馬仔嚟。
卿姐自從台灣一役俾啲左派圍攻之後，已經日日見於親北京報章。八方問佢既然警方已經同告佢嘅陳雲生落咗口供，有冇警察搵佢阿姐？佢話梗係冇啦。咁啲警察咪只聽一面之詞？卿姐話呢個問題佢冇嘢好講。
至於佢去信老董問文委會解散一事，梗係冇咁快有回音，老董放假去也，煲呔同唐少又不在，所以連行會都延至下個再下個星期二先復會，大家下周二唔好再去門口等。
傳真︰2623-9278
電郵︰