戴夢夢與2R成員Race及梁漢文等，上周一起往塞班島拍攝無綫劇集《當四葉草碰上劍尖時》外景，夢夢在當地竟有豔遇。
日前返港的夢夢接受本報電話訪問時說：「有日我哋喺酒店泳池拍外景，咁啱有班日本遊客喺度，其中有個日本仔行埋嚟同我講嘢，佢又講日文又講啲唔鹹唔淡嘅英文，我都聽唔明佢講啲乜，後尾佢就塞咗張十蚊美鈔（約七十八港元）畀我，原來佢將自己嘅電話號碼寫咗喺張銀紙上面。」
首次在螢幕上穿泳裝的夢夢，坦言起初十分尷尬，她說：「不過沙灘上個個人都着泳衣㗎啦，後尾我就覺得冇乜嘢囉。」問她有否一嘗裸泳？夢夢即說：「嘩，梗係唔得啦，我驚㗎。」
此外，有工作人員在拍攝期間遇溺，當時夢夢亦有幫手救人，幸對方並無大礙。