大市反彈，恒指在10800關口獲支持，由於假前關係，投資者多持觀望，成交唔夠108億元。恒指雖只升73點，但上升股（不計認股證）有563隻，市場氣氛仍熱熾，特別係地產、旅遊同零售股，反彈之勢更為急勁。
酒店同零售股升得急，跌得速，呢兩日，好多由高位跌咗成30%，反彈係好正常嘅，好似富豪（078）就升番13%，而一眾熱門零售股都有6%至10%進帳。中房建議收購香港2萬個空置居屋單位，能否成事，尚屬未知之數，但中國挺港之心，已昭然若揭，若然中房收購居屋唔係用作改建旅館，而係用嚟賣畀內地人，則對本港樓市無疑係一個大好訊息，所以噚日地產股普遍造好，大藍籌以新地（016）最靚，高收56.5元，升2.0元，長實（001）則升0.5元，但幾隻唔係成份股的升得重急，新世界（017）升5.0%，而鷹君（041）同嘉里建設（683）則升5.5%。
公路股已全部宣布業績，越秀交通（1052）中期增長理想，股價有反應，高收2.15元，升6%。
03年度（12月年結）的上半年，越通營業額1.91億元，升10.1%，盈利1.13億元，升45.4%，每股盈利10.7仙，中期息4仙，升33.3%。盈利增加，主要係應佔聯營公司盈利上升1671萬元，應佔共同控制實體虧損減少1462萬元，以及財務成本減少782萬元。
期內表現最突出係廣深公路廣州段，由於交通分流影響紓緩，交通流量因此大幅反彈，平均每日32291架次，大升363%，廣汕公路車流量31179架次，升9.5%；至於聯營的虎門大橋平均每日車流量32068架次，升10.5%，北環高速下降4.8%至113555架次，北二環高速升96%至10667架次。
集團未來4年每年資本開支約為2億元，建設廣州二環高速公路內的3個新項目，並會就廣東省及省外可收購項目進行研究，以回報率15%為必要條件。至6月底，集團手頭現金3億元，負債比率16%。估計03年全年盈利可達2.4億元，每股盈利22.7仙，預測PE9.47倍，股價仍有上升空間，以11倍PE計，可見2.5元。
郭兆誠