由老董天大情面請城大校長張信剛出山搞嗰個文化委員會，由四月開始喺不知不覺間消失咗。文委會入面唔少人係有頭有面人士，重係畀面張校長先落叠，但八方聽聞，今次失蹤事件真係好徹底，有知情人士同八方講，以往呢類委員會快將任滿，對口局長好好醜醜會宴請吓委員，整番封官樣文章式感謝信，但今次何局長不但冇見佢哋，重連通知任期屆滿嘅紙都冇張，刻薄少少講，直頭當文委會冇存在過，劉慧卿睇唔過眼，日前去信老董質詢。
咁又係，何局長話失憶，老董冇理由唔記得個「親生仔」啩！但知情人士話，董生處理事情要好專注，同一時間不能處理多件大事，咁啱文委會喺四月任期屆滿之時，正好係沙士期間，之後又23條，又7.1大遊行，之後阿董連自己都一身蟻，重邊得閒理呢個失寵嘅仔，難為張校長俾老友賣咗豬仔，搞完一輪連個桔都冇。
傳真︰2623-9278
電郵︰