呢個世界可能真係有心靈感應呢樣嘢。衞生福利及食物局常任秘書長尤曾家麗星期二大清早叫齊各部門開會，叫佢哋提高警惕，因為秋天轉涼，沙士隨時會捲土重來，咁啱喺星期一晚新加坡就傳出有人對沙士呈陽性反應，八方重以為個會係因此臨時召開，原來巧合而已。
尤太非常讚賞新加坡嘅處理方式，覺得做得好漂亮、有準備同埋有秩序，至於香港，尤太話，已密鑼緊鼓地改建醫院，呢個月底第一批隔離病房可望落成啟用，到時一定請大家去睇睇。
沙士期間，香港人都好守規矩，時時洗手搞清潔，但係事隔幾個月，大家不免鬆懈咗。尤太同八方講，一定要再提醒啲學校同邊境要探熱。不過，論衞生意識，香港人有排先追到日本人，尤太最近去日本旅遊，住喺間佛寺，佢話真係乾淨到不得了，出入洗手間都要換拖鞋，唔怪得人哋一宗沙士都冇。
八方都有同感，因為只要你去過一次日本旅行，你就可體會到人哋幾咁衞生，就算係深山裏面一間小飯館，都會將間舖搞得好企理，乾乾淨淨，廁所一定有廁紙，其他唔使多講。總之香港唔知幾時先做到，呢方面真係要向日本多多學習。
（圖）尤太：去完廁所唔好唔洗手呀！
設計對白
傳真︰2623-9278
電郵︰