前晚歐國盃外圍賽德國主場終於贏咗蘇格蘭，但只係小勝二比一，都唔能夠幫捧場客贏得讓一球/球半嘅上盤！
如果我求大俠無記錯，德國之前只能小勝法羅群島，以及打和立陶宛及蘇格蘭等，前晚場波都已經係德國隊連續六場歐洲國家盃外圍賽，令捧場客輸盤而回嘞，都可謂賭友「剋星」，下仗要小心啲嘞！
另外，戴利賽後喺記者會發火爆粗鬧德國隊「好演技」，令佢哋嘅羅斯領紅牌離場。計我求大俠話齋，德國隊呢啲風格都唔係今時今日至有啦，你哋應該早有心理準備就真！
沉寂咗近十年嘅保加利亞足球終於有番啲成績，以小組首名資格出線明年歐洲國家盃決賽周；而球隊陣中的前鋒揚戈維奇，正是效力大連實德。有中國甲A外援踢大型國際賽決賽周，以往好少見。而且保加利亞出線，揚戈維奇都叫有功，大連去年搵到佢都算有眼光！
德國球季雖然開始無耐，但拜仁慕尼黑主席路明尼加眼見皇馬今年夏天亞洲之行咁成功，亦計劃全力開拓日本市場搵錢，明年暑假重會去日本踢表演賽，開設紀念品專門店。歐洲富豪球會大舉東來掘金成大勢，但明年有歐洲國家盃決賽周，班球員就辛苦囉，暑假又短啲喇。
早兩日我求大俠至為西班牙「小活佛」迪拉彭拿嘅際遇感到同情，結果佢不負所望，喺些路迪試腳幾日後就搵到班落。不過唔係埋些路迪班，而係走咗去卡塔爾同班老鬼球星掘金！唉，你只不過二十六歲仔，點解唔繼續喺高水平嘅歐洲聯賽打拼，咁快就諗住過「退休生活」呢？
我求大俠發現前晚有場歐洲盃外圍賽「例行公事」，第三組摩爾多瓦主場對白俄羅斯，梳打埠竟然有開盤！臨場重要有大注狂煲主隊，平手盤打到摩讓半/一！我求大俠就收到風話東歐嗰邊有人要喺呢場做假波，結果真係摩爾多瓦贏波贏盤，博彩公司輸得慘，信不信就由你嘞！