新加坡傳出沙士疑雲，當堂令人震一震，有人話要加強入境旅客申報健康，嚴查帶病毒嘅病人。呢招冇話唔得，但衞生署、移民局要緊密合作至得。香港入境方面，大家都可以信賴，但係行過羅湖橋，又係另一番景象。
沙田陳太到深圳購物，過境填健康申報紙，彼方懶得理會，啲申報紙隨手擺，有時擺得唔四正，或者太大叠，有些少大動作，啲申報紙就散亂咗，飛到地上。如果陳太要執，隨時可執番十張八張。陳太見到咁樣，心裏驚驚地，因為上面填報咗姓名、地址、電話，以便衞生機關追查「懷疑沙士病人」及「可能遭受傳染人士」。此意本善，但係啲資料跌到隨地係，萬一畀壞人執咗，咪可以利用嚟詐騙？
陳太話：「點都係香港人緊張啲，香港入境方面，啲申報紙擺放得好好，唔會跌到地上，你想執一張都執唔到。點解咁簡單嘅事情，深圳關員都唔注意吓呢？」
呢啲係「軟體」問題，中國學習硬體、建設硬件，學得非常好，進步快。但管理軟體，辦事態度方面，始終抱着「差不多先生主義」，始終差些少，未及國際水平。香港目前在軟體管理仍然佔優勢，但好易畀人追上嘅。假如教育水平下降，辦事態度不認真嘅話，香港就乜都輸晒咯，到時想唔做伸手派，等中央打救都唔得。