內地自由行旅客在港買樓，掀起發展商同代理搞內地客來港睇樓團熱潮，美聯物業針對中國人篤信風水嘅心理，率先搞自由行風水睇樓團，安排深圳十七名客戶來港，先參觀九龍倉嘅深井碧堤半島，之後就去睇長實嘅宇晴軒示範單位。
美聯請嚟堪輿學家余中哲，全程為客戶講解唔同項目嘅風水格局。原來美聯接觸啲內地客，佢哋嘅意見係，嚟香港買樓唔會睇一次就扑槌，會搵埋風水師睇多次，為增加佢哋幫襯嘅機會，於是諗出自由行風水睇樓團呢條橋。
但點解美聯只係帶客睇兩個盤？佢哋解釋，一方面係時間唔夠；另外，碧堤嘅發展商，重維持畀內地客買家一萬蚊連卡佛禮券優惠，而個盤早排又喺內地推介過一輪，內地人較熟悉。至於呢個睇樓團，會由美聯執行董事張錦成同董事郭應龍帶隊。
鴨脷洲深灣軒混合式發展，終於落實全部以私樓形式發售，發展商話估計分畀房協嘅賣樓收益約十億，但原來呢個項目，房協只係代政府搞，所以啲錢佢哋冇份㗎。
房協話，會協助政府監察深灣軒發售過程，但就冇參與銷售策略同定價，房協員工都唔會有優先內購。政府所佔三成業權嘅淨收益，扣除房協嘅支出，餘款全部會畀番政府，房協唔會分到任何收益。
噚日係中秋佳節，不過各大發展商仍然相當勤力，依然冇間斷開記者會，務求趁節日假期推介樓盤。
長實郭子威近排負責嘅三個盤同期開賣，唔單止冇得休息，重要喺假期前夕，一日跑三場，上晝介紹東涌映濤軒，下晝就輪到畢架山一號，之後重要去睇埋長沙灣宇晴軒示範單位，呢個中秋節夠晒充實。
走富豪路線嘅新盤薄扶林貝沙灣，今年初賣完第一期，第二期𠵱家開賣。雖然電盈冇好似第一期咁，鋪天蓋地式宣傳，但售樓處嘅裝潢，仍然貫徹一向嘅「豪」氣。
除三個全新示範單位外，售樓處添置唔少新裝飾同擺設，大部份以銀色為主。聽電盈基建主席李智康講，今次喺歐洲搜羅唔少同海洋有關嘅產品，例如將貝殼漆上銀色，旁邊再放啲珍珠咁，配埋上次用金幣製成擺設，售樓處洋溢一股又金又銀嘅貴氣。
第二期單位除用料增值咗之外，住戶重可以安裝有成100Mbps嘅INP極速上網，可收睇超過一百二十個電視頻道。
樓市有番啲起色，地產代理行已經紛紛表示計劃擴充業務，世紀21奇豐董事李峻銘話，馬鞍山廣場嘅分行，已租埋隔籬單位，打通擴充經營，面積由原來三百幾方呎，增加至千四呎，重要請多十名員工。
為慶祝擴張業務同中秋節，公司請晒五間分行約五十名同事，去山頂凌霄閣食自助晚餐，表現好嘅重即場獲發獎金。
蘭西
電郵地址：
