恒指彈番73點，CEPA概念股前日散晒，昨日威晒。全日升幅最大嘅窩輪，係佐丹奴Call輪9702，收23.5仙，升幅47%，成交唔多，唔夠1球。佐丹奴（709）前日跌6.3%，昨日升3.4%，帶番起隻輪。
9702明年1月到期，溢價14.3%，槓桿率13.1倍，行使價3.28元。
若再無沙士影響，佐丹奴未來幾個月要升10-20%唔係冇可能，隻輪勉強有一博價值，不過買賣唔易，若然睇好正股，倒不如將注碼放喺正股上面。
10大龍虎榜排第3位嘅係1隻公司輪，海爾中建輪873，6萬大份易手，金額唔夠3張金牛，輪價就升25%，收5仙。隻輪明年2月到期，溢價84%，槓桿率6.2倍，行使價52仙，而正股（1169）𠵱家至係31仙，揸呢隻輪，輸面大過贏面好多；若然揸到有錢賺，則揸正股更加贏到笑，買輪不如買正股，不過正股𠵱家市值高達31億元，暫時冇盈利能力可以支撐呢個市值，最好連正股都唔買。
跌幅最大嘅，當然有唔少藍籌Put輪，例如新地Put輪9876、9906、9035。3隻輪最長壽命嘅都係明年2月到期，溢價依次係31%、28%同24%。最後下場，9成機會變廢紙。如果唔使變廢紙，則好友有大難。
章盛