近年，日本藝能界啲女優好似無乜人可以擔大旗，藤原紀香out咗、松山鳥菜菜子又掛住生仔、菊川怜同井川遙演技更加俾人彈到貼地，呢個時候，二十五歲嘅長谷川京子就開始跑出嚟喇！
京子同瀧澤秀明拍完套《屬於我的麥當娜》之後人氣急升，喺乜乜最性感女星呀、髮型最靚女星選舉入面，京子都排頭一二位。
最近佢推出三年來的新寫真集《KeyofLife》，我羅拉同一眾街坊都諗住，話晒京子都係人氣女優吖，今次乘勝追擊，重唔實行賣大包出本甚有睇頭嘅寫真集。但我睇完之後，真係唔可以唔講句：好搵笨呀！
我羅拉明白京子對自己個樣好有信心，全程唔化妝以素臉示人；亦明白佢想做出隨意寫實嘅感覺，同女攝影師喺三藩市行到邊影到邊玩snapshot；更加明白京子形象唔係sell性感，服裝都係佢着開個啲古着裙牛仔褲，最索嗰張相都係露吓背。
但係真係請恕我羅拉係俗人，京子呢本書好似求其影嘅私相簿，對於想睇佢充滿星味嘅fans嚟講，本書無疑係令人失望。
行內人認為，京子今次係擺明想走菅野美穗嗰種高格調實力路線，不過素來有唔少女星都試過行呢條鋼線，都跌咗出街唔見咗影呀！