唔少車迷都喜歡高性能房跑車類，貪其性能出眾外，重有一副好吸引嘅車身線條；箇中嘅表表者，除保時捷、法拉利外，就連積架同賓利，亦重新加入戰團。而最矚目嘅攤位，又以意大利愛快最吸引，試問你又點可以錯過，今日法蘭克福車展現場直擊嘅第2炮呢！
記者、攝影：陳偉林
逢星期一至日出版
當走近愛快攤位，不期然你會被呢部仿古跑車嘅外形所吸引住；車頭線條流暢見霸氣，而短小車尾構造，重登時洋溢出一份ClassicFeel呢！
若然你係純種雙門跑車嘅愛好者的話，當第一眼望見呢部令人怦然心動嘅愛快GT跑車的話，相信會即時有觸電嘅感覺呢！因其造型顯現有一份令人難以抗拒嘅拉丁跑車風味嘛！
響一眾超級跑車當中，又怎可以少得呢部CarreraGT一份，佢不但造型秀麗出位，部車本身大部份地方都以碳纖維模造，操控起來變得更見揮灑自如。
呢部跑車加辣版唔止外形吸引，又有豐富賽車用品配套，最突出莫過於偷輕後嘅車重，令引擎發揮更淋漓盡致。
911嘅頂級Turbo版本，向來都係以硬朗一面示人，今回廠方為其推出開篷配搭，明顯想吸納更多有品味嘅型男索女買家。
香港因SARS疫潮，而令唔少新車推遲登場，而呢部賓利21世紀全新雙門跑車，快者都要明年上半年方會響香港現身，惟一班傳媒卻可在12月，到珠海賽車場一試新車嘅操控表現呢！
咪以為呢部360Modena只不過係加上彩條修飾，以及改換上賽車用座艙咁簡單，查實佢重有其他強化改裝，因而令一台3.6公升V8偈輸出達425匹之餘，0至100公里加速度不過係4.1秒咋！
為應GT長途車賽需要，呢部法拉利575GTC唔單止換裝有全身GT大包圍、特大尾翼之餘，連座艙都要全個翻新㗎！
瑪莎拉蒂又再度進軍豪華轎車市場，今回呢部Quattroporte雖然外形一派溫文爾雅，惟內裏卻加入不少跑車元素，當中軚式+/-半自動波可見一斑。
近期唔少車廠都開拓高性能豪華SuprCar市場，而老牌英國積架車廠亦唔例外，兼且部R-D6概念車重係雙門四座位組合，外形重好吸引㖭！
從未響積架族譜出現過嘅五門Wagon，當然給車迷有一番新氣象及新鮮感，原來「捷豹」都可以有咁多變化㗎！
雖然香港富豪汽車新代理，重未跟車迷正式會面；惟全新S40車款，倒率先響今趟車展面世。跟同廠60及80車系酷似嘅佢，變得修長圓渾，而車廂重較過往豪華寬敞得多。
用上歐洲車底盤設計嘅全新Mazda3，雖然不過係家庭車類，惟新車造型有近似Mazda6影子外，頂級版嘅座艙鋪排，亦教人刮目相看，就連五門掀背版亦見瞄頭十足㗎！
