經紀黃前度愛股新灃集團（臨時編號2965），自從上星期1拆4拆細後，股價就一路係咁跌，小初見到咁嘅情況，於是打電話畀經紀黃，稱讚佢眼光獨到，識得在高位沽貨。不過經紀黃話，新灃股價下跌，只係技術調整，其實好多大戶尚未散貨。
新灃上周四拆細，變成臨時編號2965之後，股價就開始勁跌，由2.85元跌到去最低1.77元，噚日有間歐資大行出報告話睇好之後，反彈4.88%，收2.15元。
經紀黃話，新灃累積升幅大，有人趁高沽貨非常正常，但公司出售Converse套現2億元，將於下半年入帳，加上手頭大把現金，有機會派特別股息，所以見到股價跌咗咁多，佢都好有興趣博反彈。重有，新灃同裕元（551）關係密切，裕元話晒都係藍籌股，所以新灃唔應該好似一般莊家股大散。
新灃公布截至2003年6月底止中期業績，錄得股東應佔溢利5597.8萬元，較去年同期增長36.3%，每股盈利0.269元，中期息派8仙。
慕容小初