沙士再現點開祝捷騷？
馮仁昭四圍超：陳慧琳、李克勤北京飛唔起

香港人早排齊心抗沙士，幾經辛苦先至戰勝咗個病毒，而亞洲區嘅其他地方亦都相繼抗沙士成功，所以北京中央台喺上個月已經開始籌備舉行一個大型嘅戰勝沙士綜合晚會，暫名叫「香港北京再起飛」。點知近日新加坡又突然傳出有沙士新病例出現嘅消息，令到有關嘅機構都非常頭痕，唔知個騷重應唔應該繼續舉行。

歌手爭崩頭演出
今次中央台搞騷，原定喺十月二十四號喺北京工人體育館舉行，由於呢個騷係全國轉播，所以唔少歌手都打崩頭爭取上台機會，結果經中央台審批後，有份參演嘅香港歌手就包括陳慧琳、李克勤、陳慧嫻、葉蒨文、許志安、容祖兒、古巨基同黃凱芹，而內地歌手就有毛阿敏、那英同孫楠等等。
呢個騷本來就以戰勝沙士做大前提，但星洲沙士再現，搞到有關單位七國咁亂。因為沙士令全球再響警號，喺呢個時候搞騷，又真係有啲尷尬，所以個騷都隨時會胎死腹中！

宋慧喬新廣告玩狂野
韓國靚女宋慧喬，早前為咗搵銀，暫時要同男友李秉憲分開，同另一型男李政宰會合，拍攝服裝品牌Clride嘅冬裝廣告。有留意開佢兩個過往一齊影嘅造型，都知佢哋興攬到實一實影相，宋慧喬有時重會「胸襲」李政宰㖭。不過喺新一輯廣告為咗表現佢哋狂野同激情一面，就你揪我我扯你，重要打到一身泥咁喎。

「演唱會之父」被追數
噚日有報館收到匿名傳真，話有「演唱會之父」之稱嘅張耀榮同佢個仔張永康，欠下一筆工程費未畀，但張耀榮噚晚就解釋其實佢哋喺年幾前，接咗天水圍一單起樓嘅建築工程嚟做，後來政府停咗個工程，張耀榮話政府都爭緊佢錢，如果地盤啲人話佢爭錢可以告佢，況且佢嘅夥計同佢講，早排收過恐嚇信，所以公司都有人報警備案。

郭可盈窒譚耀文拖延婚事
郭可盈同譚耀文噚日去咗九龍塘一間幼稚園為電視劇《俗世情真》做宣傳，譚耀文宣布今年十二月會同女朋友去加拿大結婚同擺酒，因為女朋友屋企人喺嗰邊，而身為拍檔嘅郭可盈就講笑咁話：「吓，由舊年講到今年終於結喇，恭喜佢啦！」唔知又幾時輪到佢同林文龍呢對呢？

Shine開工拜神保平安
Shine噚日去到長沙灣拍新一輯手機廣告，雖然佢哋可以得到六位數字嘅酬勞，但係就要親身上陣做好多高難度動作。徐天佑要凌空行牆，黃又南就要由一條長樓梯跣落嚟之後再跳落下一層樓，齋聽都知辛苦啦。由於廣告公司冇做拜神儀式，所以Shine嘅經理人就即時叫人去買香，重要佢兩個即刻補番拜神㖭。