食神韜韜推介五之五（逢周五刊出）
今次韜韜推介嘅大圍冬菇亭食肆充滿街坊大牌檔特色，食小菜之餘，又可以喺隔籬茶檔叫杯香滑奶茶，唔啱再配埋碗「細蓉」都重得，左配右搭都無「詐型」。主打小菜當中一味「健康版」豬骨煲，更令韜韜掃去大半煲，食到舔舔脷㖭。
記者：馬慶武 攝影：楊錦文
Model：BoBo(SunSpot)
逢星期一至日出版
全個顯徑邨嘅熟食亭（冬菇亭）都被金城小廚獨攬，負責人林先生話佢哋只不過入主咗6、7年：「我之前都係做中菜，一直都想搞番間類似大牌擋嘅食肆。而且我一直都住呢頭，咁啱呢個冬菇亭有位咪頂咗嚟做囉。當時只係一間金城小廚，主打小炒小菜，價錢大眾化又啱街坊胃口，所以生意都唔錯。之後隔籬嘅西餅店同茶餐廳相繼唔做，咁我咪做埋囉，多元化啲。」梁文韜就話：「呢度啲小菜質素幾高，最過癮係可以一邊食吓小炒，一邊歎奶茶，喺隔籬整份炸雞翼薯條都得，夠晒隨意。」
雖然有唔少客仔都好似韜韜咁專程揸車入嚟，但始終都係以做街坊生意為主，林先生話：「街坊食過好味下次一定再嚟，住得近夠方便嘛，而且呢啲位置唔會有太多新客，所以Keep舊客最緊要。」所以直到現在，無論用作製鹽焗雞嘅雞，或者新鮮生猛嘅海鮮，林生都會落手落腳揀，重會長期駐守店內確保質素。
雖然金城乜都有得食，但始終以小炒小菜最撚手。身為食家嘅韜韜就推介「健康版」豬骨煲，因為用上豬仔腿部近腳踭位置嘅豬骨，唔會好似一般豬骨煲用骨筒嚟煲至「標」晒油咁肥膩，食得健康啲。然而豬腿骨肉質一樣夠腍，又夾雜彈牙嘅筋肉，加埋胡椒、蘿蔔、粟米同煲，一上枱已經可以聞到勁濃香味。
經過好多健康專家證實食豬骨煲肥膩唔健康之後，好多人都唔敢食太多，不過呢度嘅豬骨煲就用上豬腿骨，眼睇同食落口都感覺到無咁肥膩。
林生話呢度嘅鹽焗雞係正宗東江做法，先將雞蒸至熟再過冷河，上枱前再「拖」滾水及幾次沙薑汁，咁雞嘅肉質先夠嫩滑唔會韌。
由於採訪當日啱啱打完風，所以同游水大墨魚緣慳一面，不過換嚟嘅鮮墨魚仔效果都唔差，煎炸後加上燒汁炒，一樣夠香口惹味。
地址：大圍顯徑邨熟食亭1-12號
電話：26812212
營業時間：5:30pm-1:00am
