數碼影音：
Joybee150奇招突圍金剛玻璃唔怕刮花

鏡面機一向大有市場，拎上手梗會吸引到唔少目光注視。不過弊病就係好易刮花，少少哋一條痕已經破壞晒成部機嘅觀感，粗手粗腳之人避之則吉。BenQ就新出一部Joybee150MP3機，號採用納米金剛玻璃鏡面，聽個名都知夠硬淨，唔怕刮花之餘重可當鏡用。

記者：許福合　攝影：梁細權
ImageGirl：Don
逢星期日至五出版

關心妍再任代言人
由上一部Joybee登陸香港，BenQ就搵嚟關心妍做代言人，關心妍唱功了得大家都知，Joybee150就會預載咗佢首《是誰？》MP3，方便大家即場試聽效果。

Profile
容量：128MB
播放：MP3/WMA/FM收音
模式：8種EQ
電源：內置電池（可用9小時）
體積：60×60×12.8mm
重量：55g

抵讚：功能齊全新穎，非一般MP3機可比。
要彈：需要配合電腦經USB充電，出外旅行就唔多方便。

咪以為呢部Joybee150外表正正方方，設計死板，除咗有銀及古銅兩種顏色機身去色誘用家外，機身輕巧，只重55g，最適合愛用頸繩嘅用家。當一機在手時，第一時間唔係去試聽音質，而係研究反光鏡面，影像清晰就好似照鏡一樣，而且包括LCD部份都非常硬淨，查問之下，原來面板使用咗金剛破璃鏡面，聽個名就知係堅料，具備有抗磨損、反光嘅特質，放喺手袋都唔怕刮花，而機身其他部份亦使用金屬物料，摸上手具質感，唔似玩具，單睇外表就已經值得一讚。

同步歌詞睇電子書
加塊保護面板更有重要原因，事關150內置一個面積約為4.2×2.4cm特大LCD，當然要受到特別保護，呢個LCD可同時顯示4行資料，中、英、日、韓文都能正確顯示。有咁大嘅LCD，如果只係用嚟睇歌曲資料就太浪費，所以BenQ提供一個歌詞編工具，只要預先將MP3及存有歌詞嘅文字檔轉換為MPR檔案，歌詞就會隨音樂同步於LCD上顯示，甚至可當做流動卡拉OK，隨時練唱功。呢個同步歌詞功能略一變通後，150就可用嚟睇電子書，只要係文字檔，就可當作電子書一樣使用，放段笑話睇都唔錯。

Line-In簡單即錄MP3
除咗聽得又睇得，錄音功能都非常齊全，內置咪可即時錄下現場聲，而聽緊電台都可同步錄音，不過最特別都要數Line-in錄音功能，可接上一般耳筒使用嘅插頭，所以無論Hi-Fi、CD機、MP3機，甚至電視都可錄，而錄音時間就視乎選用格式及BitRate，以內置128MB為例，最長錄音時間可達19小時。不過電池嘅耐力約為9小時，加上內置充電池設計，要經USB充電，實際要連續錄19小時就有啲困難。

試用後記：借意失手跌落地
拍攝當日烈日當空，唔使幾分鐘就已經一身汗，完成時一個唔留神，加上手濕機滑，Joybee當場滑倒地上，小記自然第一時間飛身將佢救起，估唔到金剛玻璃果然有料到，一條傷痕都冇，重繼續唱得聽得，保護力一流，靠得住！

BenQHK
查詢電話：23006929（EXT201）