林敏俐退出娛樂圈，前晚與胞妹一起返美國，左慧琪與鐘子淇前往送機。林敏俐謂最討厭機場此等傷心地方，她到機場前已哭完，故到告別時可開心展歡顏。
有份演出無綫劇集《美麗在望》的上屆港姐冠軍林敏俐，卸任後決定回美國讀書，退出娛樂圈。她前晚與胞妹一同離港返美，正在拍劇的左慧琪特地請假與鐘子淇及港姐統籌經理陳紫蓮到機場送機。
林敏俐說：「我以前過美國時有好多男同學嚟送機，嗰陣忍唔住喊。其實我自己唔係易喊嘅人，我未嚟機場前已經喊咗，所以唔會再喊。」林敏俐補充說：「我好討厭機場呢啲地方，啲人好傷心咁saygoodbye。」
林敏俐今次帶着三喼行李返美，還有十箱行李由舅父代為寄船，而港姐冠軍獎品的房車她已賣掉，尚有一層內地樓未收樓，她說：「層樓喺廣州，都唔急住賣，等我阿媽下次返嚟睇吓先，或者佢想去住吓呢。」
提到過去一年在港的生活，林敏俐說：「過去一年識咗好多好朋友，好幸運呀。」
對於何時返港，林敏俐謂不知道，而她簽約一年擔任鯊魚丸代言人，至今仍未拍攝任何廣告，林敏俐說：「合約出年五月屆滿，對方都冇要求我拍產品廣告，不過如果佢哋要我返嚟幫手，我隨時都會返嚟。」
此外，左慧琪昨日與滕麗名到西貢拍攝新劇《心慌、心郁、逐個捉》，早前有指滕麗名欺負左慧琪，故左亦決定離開娛樂圈去讀書，昨日二人否認其事，左慧琪說：「走唔係有人『恰』我，我怕留得耐更加唔捨得走，我之前讀咗兩年酒店管理，希望留喺香港完成實習課程。」
採訪、攝影：楊潔雯
